TOShKENT, 22-avgust — Sputnik. Rossiya hukumati Qozon shahrida O‘zbekistonning bosh konsulligi ochilishini ma’qulladi. Bu haqda huquqiy ma’lumotlar rasmiy internet portalida joylashtirilgan farmoyishda aytilgan.
Bosh vazir Dmitriy Medvedev tomonidan imzolangan hujjatda Qozon shahrida O‘zbekiston Respublikasining bosh konsulligini ochish haqidagi Rossiya TIV taklifini qabul qilish ko‘rsatilgan.
Qozondagi O‘zbekiston bosh konsulligi hududiga Boshqirdiston, Mariy El, Mordoviya, Tatariston, Udmurtiston, Chuvashiston, Perm o‘lkasi, Nijegorod, Orenburg, Penza, Samara, Saratov va Ulyanovsk viloyatlari kiradi.
Tatariston hukumatiga bosh konsullik uchun ijara yoki sotib olish shartlari asosida xizmat va yashash binolari ajratish tavsiya qilindi.
Ayni vaqtda Rossiya hududida Moskvadagi O‘zbekiston elchixonasi va Novosibirskdagi konsullik faoliyat ko‘rsatmoqda.
