TOShKENT, 9-avgust — Sputnik. Andijon viloyatida fuqarolar xavfsizligini ta’minlash, favqulodda vaziyatlarga yo‘l qo‘ymaslik, huquqbuzarlik va jinoyatchilikning oldini olish maqsadida "Tozalash-antiterror" tadbiri o‘tkazib borilmoqda, deb xabar qildi Andijon viloyati IIB matbuot xizmati.
Tadbirni samarali o‘tkazish maqsadida, tezkor-kriminogen vaziyat chuqur tahlil qilinib, shahar-tumanlardagi 868 ta mahallalar toifalarga ajratildi. Tekshiruvlar dastlab tezkor-kriminogen vaziyati og‘ir mahallalarda o‘tkazildi.
Ko‘p qavatli uylar, yerto‘la va chordoqlar, hovli uylari, tashkilot va korxonalar, mehmonxonalar, yotoqxonalar, ta’lim muassasalari, kafe-bar va restoranlar, savdo va boshqa xizmat ko‘rsatuvchi obyektlar, o‘ta muhim toifalangan obyektlar xavfsizlik yuzasidan tekshirib chiqildi.
O‘tkazilgan tekshiruvlar davomida 4 mingta ma’muriy huquqbuzarlik aniqlanib, tegishli choralar ko‘rildi.
Shahar-tuman ichki ishlar bo‘limlarida profilaktik hisobida turgan ma’muriy nazorat qonuni ta’siri ostiga tushuvchi shaxslardan 30 nafariga nisbatan ma’muriy nazorat o‘rnatildi.
Jinoyat sodir etib tergov va sud organlaridan yashirinib yurgan 22 nafar shaxs ushlandi.
