O‘zbekistonda kitob o‘qigan inson mashina minadi

TOShKENT, 26-iyul — Sputnik. Yoshlarimizni kitobga qaytarish, mutolaaga do‘st qilish asosiy vazifalarimizdan biriga aylanadi, dedi O‘zbekiston Respublikasi prezidentining Davlat maslahatchisi, O‘zbekiston yoshlar ittifoqi markaziy kengashi raisi Qahramon Quronboyev "O‘zA" muxbiriga bergan intervyusida.

Quronboyev yoshlar o‘rtasida kitobxonlik madaniyatini oshirish maqsadida Qoraqalpog‘iston Respublikasi, viloyatlar va Toshkent shahrida har yili "Eng kitobxon maktab", "Eng kitobxon mahalla", "Eng kitobxon oila" kabi yo‘nalishlarda tanlovlar o‘tkazilishini ma’lum qildi.

"G‘oliblarga yurtimizda ishlab chiqarilgan avtomobillar mukofot tariqasida beriladi. Bu, ishonamanki, kitob o‘qigan inson mashina minadi, degan gap ertaknamo, xomxayol emas, ayni haqiqat ekanini isbotlaydi va yoshlarda mutolaaga ishtiyoqni kuchaytiradi", — deb qo‘shimcha qildi u.

Quronboyev shuningdek, Mirziyoyevning "Kitob olami" do‘konlari tarmog‘ini O‘zbekiston yoshlar ittifoqi tasarrufiga o‘tkazish, yosh ijodkorlarning kitoblarini, yoshlar nashrlari — "Turkiston", "Molodoj Uzbekistana" gazetalari, "Yosh kuch" jurnallarini chop etish uchun "Yoshlar nashriyot uyi"ni tashkil etish kabi topshiriqlari ijrosi navqiron avlod ma’naviy-madaniy hayotida ulkan o‘zgarishlar yasashiga ishonch bildirgan.

"Bugun yoshlar deganda ko‘z oldimizga po‘rim kiyingan, bo‘ynida yo cho‘ntagida qimmatbaho matoh, quruq savlat emas, yuzidan nur-ziyo taralib turgan, odob-axloqi siyratiga balqigan, ma’naviyati yuksak shaxslar gavdalanishi kerak. Oldimizda turgan eng katta maqsad-vazifalardan biri ham shu aslida. Yoshlarni ma’rifatga, kitobga oshno qilish. Toki farzandlarimiz maktab, litsey va kollejdagi o‘qishdan tashqari har kuni, har daqiqa bo‘sh vaqtini badiiy adabiyot, gazeta-jurnal mutolaa qilishga, ma’rifatli bo‘lishga sarflamas ekan, bu maqsadga erishish qiyin", — degan suhbat davomida O‘zbekiston yoshlar ittifoqi markaziy kengashi raisi.

O‘zbekiston yoshlar ittifoqi internet tizimi orqali ma’naviy targ‘ibot ishlarini, jumladan, elektron kitobxonlikni kuchaytirishga ham alohida e’tibor qaratilishi xabar qilindi. 

Eslatib o‘tamiz, O‘zbekiston prezidenti Shavkat Mirziyoyev 2017-yil 5-iyul kuni "Yoshlarga oid davlat siyosati samaradorligini oshirish va O‘zbekiston yoshlar ittifoqi faoliyatini qo‘llab-quvvatlash to‘g‘risida"gi tarixiy farmonni imzoladi. Shu kundan e’tiboran mamlakatda yoshlarga oid davlat siyosati bilan shug‘ullanadigan yangi tuzilma — O‘zbekiston yoshlar ittifoqi faoliyat boshladi.