TOShKENT, 21-iyul — Sputnik. O‘zbekiston hukumati 2017-yil 13-iyul kuni "Toshkent-Samarqand" tezurar temir yo‘li uchastkasi bo‘ylab joylashgan aholi punktlari arxitektura qiyofasini yaxshilash va bu yerga tutash hududlarni obodonlashtirish bo‘yicha kompleks chora-tadbirlarni tasdiqlash to‘g‘risidagi qarorni qabul qildi.
Qarorda aholi turar joylarini kapital ta’mirlash, tomlarini almashtirish, uy fasadlarini qayta ta’mirlash hamda zamonaviy temir panjaralar o‘rnatish to‘g‘risidagi topshiriqlar bayon etilgan. Qayta ta’mirlash ishlari 3 ming ortiq uylarda amalga oshiriladi. Ushbu ishlarni amalga oshirish uchun 33 mlrd so‘m sarf etiladi. Barcha ishlar 2017-yil 1-oktabrga qadar yakunlanishi zarur.
Bundan tashqari, temir yo‘l bo‘ylab Toshkent, Sirdaryo, Jizzax va Samarqand viloyatlarida yangilangan namunaviy loyihalar bo‘yicha 629 ta yangi arzon turar-joylarni qurish rejalashtirilmoqda.
Yana bir muhim jihat — bu ko‘priklar hamda yo‘l o‘tkazgichlarning joriy ta’mirlash ishlarini yakunlash, shuningdek, «Toshkent-Samarqand» tezurar temir yo‘liga yaqin joylashgan eskirgan yo‘l belgilarini almashtirish, manzarali daraxtlarni ekish, meloratsiya va irrigatsiya obyektlarini tartibga keltirish bo‘yicha vazirlik va idoralarga topshiriqlar berildi.
