TOShKENT, 7-iyul — Sputnik. O‘zbekiston prezidenti Shavkat Mirziyoyev Namangan viloyati Mingbuloq tumanidagi "Mingbuloqneft" O‘zbekiston — Xitoy qo‘shma korxonasiga tashrif buyurdi, deb xabar berdi prezident matbuot xizmati.
Xabarda aytilishicha, mazkur loyiha O‘zbekistonning 2017-yil Davlat investitsiya dasturining manzilli ro‘yxatiga kiritilgan bo‘lib, ayni paytda bosh pudratchi — "Xibu Duolling Engineering" kompaniyasi burg‘ilash maydoni va vaxta qarorgohidagi tayyorgarlik ishlari yakuniga yetkazildi.
Joriy yilda Mingbuloq neft koni ma’muriy binosini ta’mirlash, M15 qidiruv-burg‘ilash qudug‘ini ishga tushirish va boshqa tadbirlarni amalga oshirish uchun Xitoy moliya-tijorat institutlari kiritadigan 15 million dollarga teng sarmoya o‘zlashtirilishi ko‘zda tutilgan.
"Mingbuloq konida qidiruv va qazib olish" loyihasi uzoq istiqbolga mo‘ljallangan keng ko‘lamli loyihadir. Loyiha doirasida 4 qidiruv-burg‘ilash qudug‘i ishga tushiriladi va 4 mavjud quduq kapital ta’mirlanadi.
Yaqinda bu yerda M15 qidiruv qudug‘i ishga tushirildi. Quduqda burg‘ilash ishlari katta — 6 ming metrgacha chuqurlik, anomal bosim — 1200 atmosfera bosimi va kollektorlarning geologik murakkab tuzilishi sharoitida olib borilishi eng zamonaviy muhandislik yechimlarini taqozo etadi. 25-yilga mo‘ljallangan va umumiy qiymati 255 million dollardan ortiq bo‘lgan ushbu loyiha natijasida Mingbuloq neft konidan yiliga 200 ming tonna suyuq uglevodorod qazib olish rejalashtirilgan.
M15 qidiruv-burg‘ilash qudug‘ining ishga tushirilishi bilan 130 dan ziyod ish o‘rni yaratildi.
Eslatib o‘tamiz, prezident Shavkat Mirziyoyev 2017-yil 11-13 may kunlari Xitoyga davlat tashrifi davomida Xitoy Milliy neft-gaz korporatsiyasi direktorlar kengashi raisi Van Ilin bilan uchrangan edi. Uchrashuvda yuqori texnologiyalar sohasidagi loyihalar ijrosining istiqbollari va O‘zbekiston iqtisodiyotining ustuvor tarmoqlariga Xitoy sarmoyasini jalb etish masalalari muhokama qilingan edi.
