TOShKENT, 30-iyun — Sputnik. Bugun, 30-iyun kuni Toshkent shahrida O‘zbekiston "Kamolot" yoshlar ijtimoiy harakatining IV Qurultoyi bo‘lib o‘tmoqda. Bu haqda Uznews nashri xabar berdi.
Qurultoyda chiqish qilgan O‘zbekiston prezidenti Shavkat Mirziyoyev "Kamolot" YoIH tugatilganini, uning o‘rnida O‘zbekiston yoshlar ittifoqi davlat tashkiloti tuzilgani haqida ma’lum qildi.
Qurultoyda ishtirok etayotgan manbalarning ma’lum qilishicha, prezident yangi yoshlar tashkilotiga ko‘plab vakolatlar taqdim etgan. Jumladan, "Yoshlar" telekanali aksiyalarining 50 foizi yangi tashkilotga o‘tgan.
Prezident ushbu telekanalni yoshlar hayotini yoritishda sustkashligi uchun tanqid qilgan. U O‘zbekiston xalq artisti Ozodbek Nazarbekovni o‘zining media sohasi bo‘yicha vakili hamda telekanal rahbari etib tayinlagan.
Bizning Telegramdagi o‘zbekcha kanalimizga obuna bo‘ling va eng yangi xabarlarni birinchi bo‘lib o‘qing.
