Umra ziyoratchilari O‘zbekistonga qaytdi

TOShKENT, 29-iyun — Sputnik. 28-iyun kuni kechqurun o‘zbekistonlik "Umra-2017" Ramazon mavsumi ziyoratchilari Vatanga sog‘-salomat qaytdilar, deb xabar qildi Din ishlari bo‘yicha qo‘mita matbuot-xizmati.

"Ziyoratchilarni kutib olish Din ishlari bo‘yicha qo‘mita, O‘zbekiston musulmonlari idorasi, davlat va jamoat tashkilotlari hamkorligida amalga oshirildi. Ko‘tarinki kayfiyatda qaytgan ziyoratchilarimiz yuqori saviyada tashkil etilgan ziyorat uchun o‘z minnatdorchiliklarini bildirdilar", — deyiladi xabarda.

"Avvalambor, bunday xayrli ishlar boshida turib, biz kabi ziyoratchilarga alohida e’tibor qaratib kelayotgan Prezidentimiz Shavkat Mirziyoyevga o‘z tashakkurlarimizni bildiramiz. Ziyoratchilar ibodatlarini amalga oshirishlari uchun barcha qulay shart-sharoitlar yaratilgan. Bunday tartib bilan tashkil etilgan ziyorat faqat tahsinga sazovor. Ishchi guruhning joylardagi harakatlari, guruhboshilarning ibodatlarimizga bergan ahamiyati, shifokorlarning xush muomalaliligi, oshpazlarning milliy taomlarni tayyorlashda mahorati — hammasi o‘z vaqtida, joyida bo‘ldi. Biz Yurtimiz tinchligi, obod va farovonligini tilab muborak qadamjolarda duolar qildik", — deb aytgan Haj ziyoratidan qatygan xorazmlik Shirin Matkurbanova.

Eslatib o‘tamiz, ziyoratchilarning oxirgi guruhlari 29-iyun kuni Toshkentga qaytib keladilar.

Bizning Telegramdagi o‘zbekcha kanalimizga obuna bo‘ling va eng yangi xabarlarni birinchi bo‘lib o‘qing.