TOShKENT, 22-iyun — Sputnik. Toshkentdagi "Birodarlar qabri" majmuasida 22-iyun — Xotira va qayg‘u kuni munosabati bilan gul qo‘yish marosimi bo‘lib o‘tdi, bu haqida RIA Novosti xabar qilmoqda.
"Tantanali marosim qatnashchilari Mangu olov yodgorligiga gul qo‘yishdi va Ikkinchi Jahon urushi qahramonlari va qatnashchilari xotirasini yod etishdi", — deyilgan Rossotrudnichestvo matubot xizmati xabarida.
Marosimda Rossiya elchixonasi va Rossiya madaniyat va fan markazi xodimlari, O‘zbekiston ijtimoiy tashkilotlari xodimlari hamda ta’lim muassasalari vakillari ishtirok etishdi.
Bugun 22-iyun — Rossiya Federatsiyasida Xotira va qayg‘u kuni deb e’lon qilingan. Bundan 76-yil oldin, 1941-yilning 22-iyunida insoniyat tarixida eng ko‘p qurbonlarga olib kelgan mudhish urush boshlangan edi.
"Nuroniy" jamoat tashkiloti fondi xabariga asosan Ikkinchi jahon urushida O‘zbekistonning 1,5 million aholisi ishtirok etib, ulardan 530 mingi uyiga qaytib kelmagan.
