TOShKENT, 14-iyun — Sputnik. Chimonda O‘zbekiston Favqulodda vaziyatlar vazirligi xodimlari adashib qolgan fuqaro qutqarib qolindi. Bu haqda FVV matbuot xizmati xabar berdi.
Xabarda qayd etilishicha, 10-iyun kuni Bo‘stonliq tumani "Chimon" vohasida Toshkent shahrida yashovchi fuqarolar Kim Sergey va Shuxrat Yuldashev toqqa sayr qilish maqsadida chiqishgan. Sayohat davomida ulardan biri, ya’ni Shuxrat Yuldashev piyoda qaytayotgan vaqtida yo‘ldan adashib qolganligi ma’lum bo‘ldi.
Olingan ma’lumotga asosan, Toshkent viloyati Favqulodda vaziyatlar boshqarmasi Tez harakat qilish maxsus otradi qutqaruvchilari tomonidan zudlik bilan qidiruv-qutqaruv ishlari olib borildi. Natijada 11-iyun kuni ertalab Sh.Yuldashev qutqaruvchilar tomonidan topilgan va yaqin aholi yashash punktiga olib tushilgan.
Sh.Yuldashevga zaruriy tibbiy yordam ko‘rsatildi, hozirda uning sog‘ligiga xavf yo‘q.
Bizning Telegramdagi o‘zbekcha kanalimizga obuna bo‘ling va eng yangi xabarlarni birinchi bo‘lib o‘qing.
