TOSHKENT, 21 fev — Sputnik. Rossiyaning yengil avtomobillar, mikroavtobuslar ishlab chiqaruvchi eng yirik kompaniyasi — "GAZ" guruhi Oʻzbekistonda hamkorlikda oʻz avtomobillarini ishlab chiqarishga qiziqish bildirmoqda. Bu haqda Rossiya sanoat va savdo vaziri oʻrinbosari Viktor Yevtuxov maʼlum qildi.
Uning aytishicha, "GAZ" guruhi hamkorlikda Samarqanddagi avtomobil zavodida yoki Oʻzbekiston hukumati tavsiya qilgan boshqa maydonda oʻz avtomobillari, xususan mikroavtobuslarni yigʻuv ishlab chiqarishini tashkil qilishga qiziqish bildirgan.
"Oʻzbekiston rahbariyati tomonidan ular bu loyihani amalga oshirishda hech qanday toʻsqinlik koʻrishmayotgani bildirildi", dedi Yevtuxov.
Shuningdek, Yevtuxovning maʼlum qilishicha, bugungi kunda Vektor-410 ozuqa va gʻalla yigʻuvchi kombaynlarini birgalikda ishlab chiqarishni tashkillashtirish muhokama qilinmoqda.
"Bunda "Rostselmash" Oʻzbekistonga Vektor-410 kombaynlarini Pokiston, Turkmaniston va Afgʻonistonga eksport qilish huquqini taqdim etishga tayyor", dedi Rossiya sanoat va savdo vaziri oʻrinbosari.
