TOSHKENT, 10 fev — Sputnik. Ish faoliyatida jiddiy xato va nuqsonlarga yoʻl qoʻygani uchun Oʻzbekiston ichki ishlar tizimidagi uch nafar boshqarma rahbarlari ishdan olindi. Bu haqda "Kun.uz" oʻz manbasiga tayanib xabar bermoqda.
Xabarda aytilishicha, Oʻzbekiston Respublikasi prezidenti Shavkat Mirziyoyev raisligida 9 fevral kuni boʻlib oʻtgan yigʻilishda ichki ishlar organlari faoliyati, tizimda mavjud muammo va kamchiliklar, istiqboldagi vazifalar tahlil qilingan.
Yigʻilishda oʻz ish faoliyatida jiddiy xato va nuqsonlarga yoʻl qoʻygani uchun IIV Transportdagi ichki ishlar boshqarmasi boshligʻi polkovnik Ramziddin Gʻafforov, Andijon viloyati ichki ishlar boshqarmasi boshligʻi polkovnik Dilshod Bobojonov va Toshkent viloyati ichki ishlar boshqarmasi boshligʻi polkovnik Aziz Boboxoʻjayev egallab turgan lavozimiga noloyiq deb topilgan hamda ishdan olingan.
Ularning oʻrniga kim tayinlangani hozircha nomaʼlum, deyiladi xabarda.
