TOShKENT, 11 noya — Sputnik. Ivanka Tramp — zamonaviy Amerika ayoliga yorqin misol bo‘la oladi, deb yozgan RIA Novosti axborot agentligi.
"35 yoshga to‘lgan Ivanka, nafaqat baxtli oila bekasi, balki 3 nafar farzandning onasi, omadi chopgan biznes-ledi, saxiy filantrop va shuhratga sazovor yozuvchidir. Uning ismi butun dunyoga mashhur, moda va biznes olami haqida yorituvchi jurnallar u haqda maqtab yozishadi. Qolaversa, OAVlar tomonidan "oltin qizaloq" qancha sarflagani emas, balki Ivanka Trump Organization kompaniyasiga qancha daromad keltirganini muhokama qiladilar. Trampning o‘z qiziga ishonchi ham cheksiz, u eng muhim shartnomalarni imzolashni aynan qiziga ishonib topshiradi", — deb yozadi nashr.
OAV va siyosatshunoslar uni "Tramp yulduzi" deya atashadi. Aynan Ivanka tufayli Tramp saylovlarda g‘olib chiqishga muvaffaq bo‘ldi, deb yozmoqda nashrlar. Gap shundaki, Ivanka bor kuch-g‘ayratini ishga solib, otasini qo‘llab-quvvatlab turdi, prezidentlik saylovi kampaniyasida faol qatnashib, ikkilanayotgan saylovchilarni otasi uchun ovoz berishga da’vat qilgan. Shu bois ham, yaqin to‘rt yil ichida Trampning rafiqasi Melanya emas, balki milliarderning qizi Ivanka AQShning "birinchi xonimi" bo‘lishi ham mumkin, deya xotima qiladi nashr.
