O‘zbekiston vatanga qaytgan migrantlar uchun 155 ming ish o‘rinlarini yaratdi

TOShKENT, 1 okt — Sputnik. O‘zbekiston parlamenti mamlakatda yangi ish o‘rinlarini tashkil etish sohasida ishlar qanday amalga oshirilayotganini o‘rganishga bag‘ishlangan yig‘ilish o‘tkazdi. Bu borada deputatlar oldida O‘zbekiston Mehnat vaziri Aziz Abduhakimov hisobot qildi.

Mehnat vaziri bayonotiga ko‘ra, 2016-yilning birinchi yarmida mamlakatda 462,5 mingdan ziyod ish o‘rinlari yaratilgan. Ularning kattagina qismi (305,4 minggi) O‘zbekiston banklari tomonidan ajratiladigan — fermerlar, oilaviy tadbirkorlar va kichik biznes subyektlariga berilgan imtiyozli kreditlar hisobiga tashkil etilgan. Qolgan 157,1 ming ish o‘rinlari esa qishloq xo‘jaligi sohasi, yo‘l-transport va kommunikatsiya infratuzilmasi, sanoat va xizmat ko‘rsatish sohasini rivojlantirishni o‘z ichiga olgan davlat dasturi ijrosi natijasida tashkil etilgan.

Vazir vatanga qaytayotgan mehnat muhojirlari uchun ish o‘rinlari yaratilishiga alohida e’tibor bilan qaralayotgani haqida aytgan. Unga ko‘ra, 2016-yilning birinchi olti oyi davomida vatanga qaytgan mehnat migrantlari uchun 155,5 ming ish o‘rinlari yaratilgan. Shuningdek, organlar tomonidan 124,6 ming ish izlayotgan ishsizlar ish bilan ta’minlangan, 3,5 ming kishi kasbiy mahoratini oshirishga yuborilgan, 4,9 ming kishi esa haq to‘lanadigan jamoat ishlariga yo‘naltirilgan.

Yaratilgan ish o‘rinlarining 60%dan ko‘prog‘i qishloq xo‘jaligi sohasiga to‘g‘ri kelgani, ayniqsa, e’tiborga molikdir.

"Ish bilan ta’minlash masalalarida kichik biznesning ulkan rolini e’tirof etmay iloj yo‘q. Mamlakatimizda yil boshidan "kichik iqtisodiyot"ning 16,4 ming yangi subyektlari paydo bo‘ldi, va soha butun ko‘lamda 300 mingdan ziyod kishini ish bilan ta’minladi. Bunda kichik biznes loyihalarini qo‘llab-quvvatlash uchun 8,3 trillion so‘m ajratgan tijorat banklarining roligi ham qayd etish lozim", — deb taki’dladi vazir.

Bundan tashqari, keyinchalik ish bilan ta’minlash uchun kasb-hunar kollejlari bitiruvchilarini turli korxonalarga amaliy mashg‘ulotlarga yuborish praktikasi ham o‘zini oqlagani aytib o‘tildi. Yil boshidan shu tariqa 466,4 nafar bitiruvchi ish bilan ta’minlangani qo‘shimcha qilindi.

Yig‘ilishda muammoli masalalar ham tilga olindi. Xususan, Qoraqalpog‘iston Respublikasi va Surxondaryo viloyatidagi bir qator tumanlar hokimiyatlari qoshida ish o‘rinlarini tashkil etish uchun mas’ul maxsus komissiyalar mavjud muammolar yechimiga barmoq ortidan qaragani, o‘z ishlariga mas’uliyatsizlik bilan yondashganligi uchun qattiq tanqid ostiga olindi.