TOShKENT, 28 sen — Sputnik. Joriy yilning 25-27-sentabr kunlari Qoraqalpog‘iston Respublikasi, viloyatlar va Toshkent shahrida O‘zbekiston Respublikasi Prezidenti saylovini o‘tkazuvchi okrug saylov komissiyalarining birinchi majlislari bo‘lib o‘tdi, deb xabar bermoqda O‘zbekiston TIV matbuot-xizmati.
Ta’kidlanishicha, O‘zbekiston Respublikasi Prezidenti sayloviga tayyorgarlik ko‘rish va uni o‘tkazish bo‘yicha asosiy tadbirlar dasturiga muvofiq okrug saylov komissiyalari tomonidan saylovga tayyorgarlik ko‘rish bo‘yicha tadbirlar rejasi tasdiqlandi. Shuningdek, komissiya a’zolari o‘rtasida vazifalar taqsimlangan.
Majlislarda O‘zbekiston Respublikasi Prezidenti sayloviga tayyorgarlik ko‘rish va uni o‘tkazish bo‘yicha asosiy tadbirlar dasturini amalga oshirish borasida komissiya a’zolari oldida turgan muhim, xususan saylov uchastkalarini tuzishga oid vazifalar ham muhokama qilingan.
Majlislarda saylovga tayyorgarlik ko‘rish va uni o‘tkazish bilan bog‘liq barcha tadbirlar saylov komissiyalari tomonidan ochiq va oshkora, "O‘zbekiston Respublikasi Prezidenti saylovi to‘g‘risida"gi Qonunga to‘liq muvofiq holda amalga oshirilishi ta’kidlangan. Okrug saylov komissiyalarining matbuot markazlarini tuzish haqida qarorlari qabul qilingan.
Okrug saylov komissiyalari majlis yakunlari bo‘yicha ommaviy axborot vositalari vakillari uchun brifinglar o‘tkazilgan.
