Ungar-Too hodisasidan so‘ng: O‘zbekiston va Qirg‘iziston o‘z chegaralarini yana ochdi

TOShKENT, 19 sen — Sputnik. O‘zbekiston va Qirg‘iziston Ungar-Too tumanidagi bahsli hudud bo‘yicha muammolarni bartaraf etishgach, ikki davlat chegarasidagi nazorat-o‘tkazish punkti yana o‘z faoliyatini tiklaganligi xabar qilinmoqda.

"19 sentabr kuni 08.00dan boshlab o‘zbek-qirg‘iz chegarasidagi nazorat-o‘tkazish punktlari odatiy tartibda faoliyat yurita boshladi", — deb xabar qilindi dushanba kuni Qirg‘iziston chegara xizmati rasmiy saytida.

Qirg‘iziston prezidenti matbuot-xizmati xabariga ko‘ra, shanba kuni O‘zbekiston muvaqqat prezidenti Shavkat Mirziyoyev va Qirg‘iziston rahbari Almazbek Atambayev o‘rtasida telefon suhbati bo‘lib o‘tgan. Shundan so‘ng, yakshanba kuni O‘zbekiston tomon Ungar Too uchastkasidan IIV xodimlarini olib chiqib ketgan.

Qirg‘iz OAV jurnalistlarining tekshiruvlariga ko‘ra 2006-yilda prezident Kurmanbek Bakiyev davrida qirg‘iz-o‘zbek chegarasidagi Ungar-Too tog‘idagi bahsli hudud o‘zbeklarga tegishli ekanligi haqida hujjat imzolangan. Ungar-Tooning umumiy maydoni 45 gektarga teng. 2013-yilda O‘zbekiston Ungar-Tooda o‘z chegara postini o‘rnatishga uringani chegara atrofida nizo keltirib chiqargandi. O‘shanda tomonlar tinch kelishuv yo‘lini tanlashgan va “Kerben” radiorele stansiyasi o‘z ishini davom ettirgandi.