"GTA bandasi" ishi sudga yo‘naltirildi

TOShKENT, 25-iyun — Sputnik. “GTA bandasi” ustidan qo‘zg‘atilgan jinoiy ish sudga yo‘naltirildi. Jinoiy birikma a’zolari banditlik, qotilliklar, bosqinchilik ishlari, noqonuniy tarzda qurol yasash hamda saqlashda ayblanmoqda deb xabar qilmoqda RIA Novosti Rossiya Bosh prokuraturasidan olingan ma’lumotlar asosida.

"Rossiya Federatsiyasi Bosh prokurori o‘rinbosari Viktor Grin Hazratxon Dodaxonov, Holiq Subhonov, Anvar Ulug‘murodov, Fazliddin Hasanov, Sherzodjon Qodirov, Mirzomavlon Mirzosharipov, Abdumuqim Mamadjonov, Umar Hasanov va Zafarjon G‘ulomovlarga nisbatan qo‘zg‘atilgan jinoiy ish bo‘yicha ayblov xulosalalari e’lon qilinganini tasdiqladi. Jinoyatlarda ishtiroki darajasiga asosan ular banditlik, qotilliklar, bosqinchilik ishlari, noqonuniy tarzda qurol yasash hamda saqlashda ayblanmoqda", — deyiladi xabarda.

Jinoiy ish hozirda Moskva viloyat sudiga yo‘naltirilgan.

Jinoiy birikma boshlig‘i qo‘lga olinish jarayonida huquqni muhofaza qilish organi xodimlariga qurol yordamida qarshilik ko‘rsatgani bois, voqea joyida o‘ldirilgan, Rossiya hududidan chiqib ketgan guruhning besh nafar  a’zosi xalqaro qidiruvga berilgan.

Eslatib o‘tamiz, 2014-yilda Rossiyaning M4 “Don” avtotrassasida noma’lum jinoiy guruh tomonidan bir qator qotilliklar sodir etilgan edi. Mahalliy OAVlar jinoiy guruhga “GTA bandasi”, deb nom berdi. 2014-yilning noyabr oyida huquqni muhofaza qilish organlari tomonidan o‘tkazilgan tezkor-surishtiruv tadbirlar davomida, banda rahbari Ubaydullo Subhonov yashiringan joy aniqlandi va o‘tkazilgan operatsiya davomida, u yo‘q qilindi. Guruhning to‘qqiz nafar a’zosi ham tez orada hibsga olindi, yana besh nafari esa xalqaro qidiruvga berildi. 2015-yilning oktabr oyida tergov ishlari tugatildi.

“GTA bandasi” a’zolari, guruh faoliyati davrida Moskva shahri, Moskva hamda Kaluga viloyatlari hududida 16ta hujumni amalga oshirishgan. Jinoiy ishlar davomida 17 kishi o‘ldirilgan, ikki kishi jarohatlangan.