TOShKENT, 28-may — Sputnik. Turkiya Bosh vazirining o‘rinbosari No‘mon Qurtulmush yevropalik siyosatchilarning Turkiya 3000-yilga kelib YeIga a’zo bo‘lishi mumkinligi haqidagi fikrini sharmandali, deb topdi. RIA Novosti xabari asosida.
Turkiyaning 3000-yilga kelib YeIga a’zo bo‘lishi haqida o‘tgan haftada Buyuk Britaniya Bosh vaziri Devid Kemeron aytgan edi.
"Agar kimdir Turkiyaning YeIga a’zo bo‘lishi muddati 3000-yilgacha cho‘ziladi, deb ta’kidlasa, unda bu Turkiya uchun emas, balki, shunday fikrni bildirganlar uchun sharmandalik hisoblanadi. Ular YeIni 30-yildan keyin nima kutayotganini bilisharmikin? Biz viza tartibini osonlashtirish bo‘yicha olgan ko‘rsatmalarni bajarish harakatidamiz. Shu bilan birga, Turkiya YeIga tobe’ emasligini aytib o‘tmoqchiman", — dedi Qurtulmush Turkiyada parlamentda nutq so‘zlar ekan.
