OAV: EgyptAir qurbonlari tahlili samolyot bortida portlash bo‘lganini ko‘rsatmoqda

TOShKENT, 24-may — Sputnik. Halokatga uchragan EgyptAir samolyoti qurbonlari tana qoldiqlari analiz qilindi. Tahlillar natijasi, samolyot bortida portlash ro‘y berganini ko‘rsatmoqda, deb xabar qilmoqda RIA Novosti, Assoshieyted Press kriminalistidan olingan ma’lumot asosida.

Fojia qurbonlari tana qoldiqlarini o‘rganishda ishtirok etgan surishtiruv guruhining bir a’zosi Qohiraga 80 dona inson tana a’zolari qismlari olib kelinganini aytdi. "Ular orasida, hatto butun qo‘l yoki oyoq mavjud emas. Bundan kelib chiqib taxmin qilish mumkin-ki, samolyot bortida portlash bo‘lgan", — dedi kriminalist.

"Ammo portlash qanday va nima sababdan sodir bo‘lganini ayta olmayman", — qo‘shimcha qildi suhbatdosh.

Misrlik ekspert-kriminalistlarning xabariga ko‘ra, portlovchi moddalar izlari hozircha aniqlanmagan, deb xabar qilmoqda Reyter agentligi.

Eslatib o‘tamiz, Parijdan Qohiraga qarab yo‘l olgan A320 EgyptAir samolyoti O‘rta Yer dengizi ustidan uchib o‘tayotgan vaqtda radarlardan yo‘qolib qolgan. Sal vaqt o‘tib, samolyot qoldiqlari Karpatos orolining janubiy qismidan topildi. Samolyot bortida 66 nafar yo‘lovchi va ekipaj a’zolari bo‘lgan, ularning birortasi omon qolmagan. Layner "qora qutilari" hozircha topilgani yo‘q. Halokat sabablaridan biri sifatida bortda yuz bergan portlash ko‘rsatilmoqda. Ammo shu paytga qadar birorta terrorchilik uyushmasi ushbu portlash uchun javobgarlikni o‘z bo‘yniga olgani yo‘q.