TOShKENT, 1 apr — Sputnik. AQSh prezidenti Barak Obama va Ukraina prezidenti Potr Poroshenko Vashingtonda o‘tkazilgan yadro xavfsizligi sammiti vaqtida Kiyevga ajratilayotgan ulkan miqdordagi kredit liniyasining uchinchi transhi shartlarini muhokama qildi, deb xabar qiladi Ukraina prezidenti matbuot-xizmati, RIA Novosti xabari asosida.
"Obama Ukrainaga beriladigan kreditning uchinchi transhi bir milliard dollarni tashkil qilishini va bu mablag‘lar Ukraina hukumati shakllangach berilishini tasdiqladi”, — deyiladi xabar matnida. Shuningdek, tomonlar Donbassdagi vaziyatni muhokama qilishgani ta’kidlanmoqda.
Ukraina Bosh vaziri Arseniy Yatsenyukni iste’foga chiqarish uchun amalga oshirilgan no‘noq urinishdan so‘ng, Kiyevda siyosiy inqiroz avj oldi. Bu voqeadan keyin mamlakatdagi bir qatorfraksiyalar koalitsiyadan chiqishlarini ma’lum qildi. Ularni hanuzga qadar birlashtirish imkoni topilgani yo‘q.
Shuningdek, AQSh hukumati Ukrainaga 335 million dollar miqdorida harbiy yordam ajratmoqchi. Bu mablag‘lar harbiylarni tayyorlashga, yangi maslahatchilarni jalb qilishga hamda qurol-aslaha uchun sarflanishi aytilmoqda.
