TOShKENT, 22 mar – Sputnik. Qirg‘iziston Bosh vaziri Temir Soriyev Ola-Buqa tumani aholisi bilan uchrashdi. Mahalliy xalq Bosh vazirdan chegaradagi vaziyat tezroq o‘z yechimini topishini talab qilib, hukumat bu yo‘nalishda sustkashlik bilan ish olib borayotganini ta’kidladilar, deb xabar qilmoqda Sputnik Qirg‘iziston.
"Biz Qirg‘izistonning bir santimetr yerini ham hech kimga berib qo‘ymaymiz. Bu — Qirg‘iziston respublikasi prezidenti va hukumatining qat’iy qarori", — dedi Soriyev.
Qirg‘iziston Bosh vaziri ushbu masala xalqaro kelishuvlar asosida hamda xalqaro huquq normalariga muvofiq tarzda hal etilishini ta’kidladi. Va “ikki davlat o‘rtasida chegaraning aniq belgilanishi masalasi ertami-kechmi ikkiyoqlama kelishuv asosida o‘z yechimini topadi”, deya va’da berdi.
