TOShKENT, 17 fev – RIA Novosti. 2016-yilda tashkil etiladigan Respublika diyetologiya o‘quv-ilmiy markazi tekshiruvdan o‘tish orqali, noto‘g‘ri ovqatlanish tufayli yuzaga kelishi mumkin bo‘lgan xastaliklarni aniqlash imkonini beradi.
O‘zbekiston Sog‘liqni saqlash vazirligi ma’lumotlariga ko‘ra, mamlakatda aholining 20,2 % ortiqcha vaznga ega. Katta yoshdagi aholining 67,2% Jahon Sog‘liqni saqlash tashkiloti tomonidan tavsiya etilgan normalardan kamroq meva va sabzavotlar iste’mol qilishlari ma’lum.
Ammo mamlakatimizda amalga oshirilayotgan izchil chora-tadbirlar samarasida so‘nggi o‘n yilda vazni tibbiyotda ko‘zda tutilgan meyordan kam bo‘lgan bolalar ikki barobardan ziyod kamaygan, ularning bo‘yi o‘rtacha 3 santimetrga o‘sgan. Xotin-qizlarda kamqonlik darajasi 2,5 marta pasaygan. Aholining o‘rtacha umr ko‘rish ko‘rsatkichi oshib bormoqda.
O‘zbekistonda bu borada erishilayotgan muhim natijalar xalqaro miqyosda tan olinmoqda. 2015-yilda mamlakatimiz BMTning oziq-ovqat va qishloq xo‘jaligi tashkilotiga a’zo davlatlarning oziq-ovqat xavfsizligini ta’minlash sohasida Mingyillik rivojlanish maqsadlariga erishgani uchun beriladigan mukofotiga sazovor bo‘lgan 14 davlatdan biri sifatida e’tirof etilgani buning tasdig‘idir.
