TOShKENT, 23 dek — Sputnik. Markaziy saylov komissiyasi raisi Mirzo-Ulug‘bek Abdusalomov matbuot anjumanida o‘tkazilgan saylovlar kamchiliklariga to‘xtalib o‘tdi, deb xabar qilmoqda Sputnik O‘zbekiston muxbiri.
Uning ma’lum qilishicha, Toshkent shahrida ovoz berishda saylovchilarning boshqa viloyatlardagi saylovchilar soniga nisbatan pastligi kuzatildi. Bu esa ko‘pchilik yirik shaharlar aholisiga xos tendensiyadir.
Ba’zi saylov uchastkalarida “oilaviy ovoz berish” holatlari aniqlangan. Saylov bulletenlariga saylovchilar tomonidan qo‘yilgan imzolarning o‘xshashligi, ovoz berish kuni elektr energiyasidagi uzilishlar sababli Saylovchilarning yagona elektron ro‘yxati tizimidani foydalanishning imkoni cheklangani kabi kamchiliklar kuzatilgan.
Abdusalomov bo‘lib o‘tgan saylov kampaniyasini o‘tkazish bilan bog‘liq barcha ma’lumotlar tizimli o‘rganib, uning xulosalari yuzasidan 2020-yilning ikkinchi choragida saylovda ishtirok etgan xalqaro tashkilotlar va xorijiy davlatlarning kuzatuvchilari hamda ekspertlari ishtirokida xalqaro konferensiya o‘tkazish rejalashtirilganini qayd edi.
Qayd etilishicha, unda barcha kamchilik va muammolarni atroflicha tahlil qilinadi. Saylov qonunchiligi va amaliyotini yanada takomillashtirish chora-tadbirlari belgilab olinadi.
Eslatib o‘tamiz, 22-dekabr kuni O‘zbekiston Oliy Majlisi Qonunchilik palatasiga, Xalq deputatlari viloyat, tuman va shahar kengashlariga saylovlar bo‘lib o‘tdi. Saylovlarda chet el bilan birga hisoblaganda 13,9 mln nafar saylovchi ishtirok etdi va bu saylovchilar umumiy sonining 67,8 foizidan iboratdir. Oliy Majlisi Qonunchilik palatasiga O‘zLiDePdan – 43 nafar, “Milliy tiklanish”dan – 35 nafar, “Adolat” sotsial-demokratik partiyasidan – 21 nafar, XDPdan – 18 nafar, Ekologik partiyasidan – 11 nafar deputat saylandi.
