TOShKENT, 6-iyun - Sputnik. “Biz suhbat va muzokaralar uchun ochiqmiz”, deb boshlanadi “Oq-tepa lavash” kompaniyasining Feysbukdagi rasmiy sahifasida qoldirilgan xabarda.
“Bo‘lib o‘tganlar uchun javobgarlikni to‘liq o‘zimizga olamiz. Biroq hozir eng muhimi – jabrlanganlarga yordam berish”, - deyilgan xabarda.
Shuningdek, sahifada kompaniya rahbariyati zaharlangan bemorlar ahvolidan xabar olish uchun kasalxonaga borgani, hamda keltirilgan ma’naviy zarar va davolanish xarajatlarini qoplaganini xabar qilishgan.
Sputnik muxbiri bilan bo‘lgan suhbatda kompaniya vakili zaharlanish sabablari hozircha 100% aniqlanmaganini va ushbu holat yuzasidan tekshirish o‘tkazilayotganini va xabar qilishdi.
Tan olish kerak-ki, ovqatdan zaharlanish yoz mavsumida O‘zbekistonda tez-tez uchrab turadigan hol, lekin aybdor tomon o‘z aybini darhol bo‘yniga olib, javob berishga tayyor turishi – bu juda yaxshi yangilik.
Boshqalar ham bundan o‘rnak oladi degan umiddamiz. Biz esa OAV sifatida vaziyatni diqqat bilan kuzatishda davom etamiz.
