TOShKENT, 26 sen — Sputnik. "Rossiya mamlakatlarimiz o‘rtasida qishloq xo‘jaligi sohasidagi keng ko‘lamli va o‘zaro manfaatli amaliy hamkorlikni rivojlantirishdan manfaatdor", — dedi Mirziyoyev bilan uchrashuvda 25-sentabr kuni O‘zbekistonga amaliy tashrif bilan kelgan Rossiya qishloq xo‘jaligi vaziri Aleksandr Tkachev.
Mamlakatlar o‘rtasida mavjud bo‘lgan "yashil yo‘lak" doirasida Rossiya bozoriga yetkazib berilayotgan ho‘l va qayta ishlangan meva-sabzavot mahsulotlarining turi va hajmi kengayib bormoqda. Rossiya tashkilot va kompaniyalari har yili O‘zbekistonda o‘tkazilayotgan Xalqaro meva-sabzavot yarmarkasida faol ishtirok etib kelmoqda. Shu oyning boshida bo‘lib o‘tgan navbatdagi yarmarka yakunida umumiy qiymati 500 million dollardan ortiq bo‘lgan eksport shartnomalari imzolandi.
Agrosanoat majmuida qo‘shma dastur va loyihalar amalga oshirilmoqda. Intensiv bog‘dorchilik, issiqxonalar xo‘jaligi, chorvachilikni rivojlantirish, seleksiya va urug‘chilik sohalari shular jumlasidandir. Mamlakatlar ilmiy-tadqiqot institutlari va oliy ta’lim muassasalari o‘rtasida samarali hamkorlik yo‘lga qo‘yilgan.
Agrar sohada kooperatsiyani kuchaytirish va qo‘shma ishlab chiqarishlarni tashkil etish, jumladan, qishloq xo‘jaligi mahsulotlarini chuqur qayta ishlash, urug‘lik va veterinariya preparatlari tayyorlash muhimligi qayd etildi. Malakali mutaxassislar tayyorlash sohasida hamkorlikni kengaytirishga kelishib olindi.
Rossiya qishloq xo‘jaligi vaziri Shavkat Mirziyoyevga samimiy qabul uchun minnatdorlik bildirib, Rossiya prezidenti Vladimir Putin va Hukumat raisi Dmitriy Medvedevning salomi va ezgu tilaklarini yetkazdi.
