TOShKENT, 12 okt — Sputnik. 11-oktabr kuni O‘zbekiston Respublikasi Markaziy saylov komissiyasida YeXHT Demokratik institutlar va inson huquqlari bo‘yicha burosi saylov departamenti rahbari Aleksandr Shlik boshchiligida mamlakatimizga tashrif buyurgan Ehtiyojlarni baholash missiyasi (EBM) ekspertlari bilan uchrashuv bo‘lib o‘tdi.
EBM ekspertlarining fikricha, Markaziy saylov komissiyasi tomonidan bo‘lajak saylovlarni kuzatish yuzasidan YeXHT Demokratik institutlar va inson huquqlari bo‘yicha burosiga taklifnomaning o‘z vaqtida yuborilgani xalqaro saylov standartlari talablariga to‘la mos keladi.
Uchrashuvda qayd etilganidek, Markaziy saylov komissiyasi fuqarolarning saylov huquqlari kafolatlarini ta’minlashga qaratilgan huquqni qo‘llash amaliyotini izchillik bilan takomillashtirmoqda. Bunda xalqaro kuzatuvchilar, xususan, YeXHT Demokratik institutlar va inson huquqlari bo‘yicha burosining o‘tgan saylovlardagi kuzatuvlari natijalari bo‘yicha tavsiyalari inobatga olinmoqda.
YeXHT Demokratik institutlar va inson huquqlari bo‘yicha burosining Ehtiyojlarni baholash missiyasi ekspertlari Markaziy saylov komissiyasi tomonidan okrug saylov komissiyalari vakillari uchun o‘tkazilgan onlayn seminar-treninglarga ham yuqori baho berdi.
Uchrashuvda YeXHT Demokratik institutlar va inson huquqlari bo‘yicha burosining Ehtiyojlarni baholash missiyasi ekspertlari faoliyatini samarali tashkil etish, ikki tomonlama hamkorlikni yanada mustahkamlashga oid masalalar yuzasidan o‘zaro fikr almashildi.