TOShKENT, 22 sen — Sputnik, Aleksandr Kuranov. Chexiya prezidenti Milosh Zeman BMTni xalqaro terrorchilikka qarshi kurashda sust ishtiroki uchun keskin tanqid ostiga oldi, deb xabar qilmoqda RIA Novosti.
Zeman o‘z nutqi davomida, shuningdek, bir necha yil oldin radikal islom ta’siri ostiga tushgan davlatlar soni atigi oltita bo‘lganini, hozirda esa ular soni 35tani tashkil etishini qo‘shimcha qilgan.
"Roppa-rosa bir yil oldin BMT Bosh Assambleyasida men terrorchilikka qarshi kurashni kuchaytirishga da’vat qilgan edim. Va aynan o‘tgan yil mobaynida Parijda, Brusselda, Istambulda, Orlandoda, Munxenda, Nissada, Nyu-Yorkda teraktlar sodir etildi. Qachongacha birlashi borasidagi bayonotlar bilan chiqish qilamiz? Qachongacha o‘zimizning hamdardligimizni izhor qilishda davom etamiz? Biz barcha ikkilanish, qo‘rquvlarni o‘zimizdan uloqtirib, qat’iy harakatlarga o‘tishimiz lozim", — deya da’vat qildi Chexiya prezidenti.
Milosh Zeman, xuddi bir yil oldingi singari, xalqaro kuchlarni tashkil qilish taklifini ilgari surdi. Unga ko‘ra, uchuvchisiz boshqariladigan samolyot, vertolot va boshqa mobil qurol-yarog‘lar bilan ta’minlangan bu uyushma terrorchilarning qo‘mondonlik, logistik va mashg‘ulot o‘tkazish markazlariga hujum uyushtirishi uchun kerak.
"Bizga kengaytirilgan hududiy operatsiyalar kerak emas. Iroq, Suriya va Liviyadagi no‘noq tajribalarimiz bunga yaqqol misol bo‘la oladi. Biz u yerda hamma narsani barbod qildigu, hech narsa bunyod etmadik. Territoriyalarni okkupatsiya qilishning keragi yo‘q. Biz terrorchilik uyushmalarining tanasiga emas, miyasiga hujum uyushtirmog‘imiz darkor", — deya o‘z nutqiga yakun yasadi Zeman.