TOShKENT, 15 sen — Sputnik. O‘zbekistonning Birinchi Prezidenti Islom Karimov shunday pishiq bir siyosiy tizimni barpo etgan-ki, shu tufayli hukumatning yangi rahbarga o‘tishi osoyishta kechadi, umuman olganda, respublikada keyingi 5-10 yil davomida barqarorlik hukm surishiga umid qilish mumkin, deb hisoblaydi Islom Karimovning sobiq hamkasbi, Qirg‘izistonning birinchi prezidenti Askar Akayev.
Islom Karimov insult oqibatida 2016-yil 2-sentabr kuni Toshkent shahrida vafot etdi. Marhum o‘zining ona-shahri Samarqandda musulmon urf-odatlariga ko‘ra dafn etildi. O‘zbekiston Respublikasining prezidenti v.b. etib Bosh vazir Shavkat Mirziyoyev tasdiqlandi. O‘zbekiston respublikasi prezidenti saylovlari 4-dekabrga belgilangan.
"Men hamisha bu tranzit osoyishta, yumshoq shaklda kechadi degan fikrda bo‘lganman. Hokimiyatning meros bo‘lib boshqaga o‘tishi an’anasi saqlanib qolajak. Islom Karimov hokimiyatning buyuk murabbiyi, shaxmat tili bilan aytganda, grossmeysteri edi. U shunday hukumatni barpo etganki, eng kamida 5-10 yil davomida bu tizimda favqulodda to‘xtashlar bo‘lmasligi muqarrar", — deya ta’kidladi RIA Novosti axborot agentligiga Akayev.
Bundan tashqari, O‘zbekistonda ba’zi boshqa respublikalardan farqli o‘laroq, davlatdan avtonom bo‘lgan, "mustaqil faoliyat yuritadigan moliyaviy-oligarxlar guruhlari yo‘q", — deya ta’kidlab o‘tdi suhbatdosh.
Akayevning fikriga ko‘ra, "mamlakatda ikkinchi odam" hisoblangan Bosh vazir (Mirziyoyev) hozirda birdaniga birinchi odamga aylangan. "Parlament bir ovozdan u uchun ovoz berdi. Aslida parlament allaqachon uni sayladi deb aytish mumkin, u yerda (parlamentda) esa hamma (klanlar va guruhlar) bor. Garchi konstitutsiya bo‘yicha 3 oy davomida prezident vazifasini Senat raisi bajarishi lozim bo‘lsa-da, ammo… O‘zbekiston elitasi uni tan oldi", — deb ta’kidladi Akayev.
Ammo sal keyin nima bo‘lishi haqida hozircha biron bir fikr bildirish qiyin, deydi suhbatdosh. "Yashasak ko‘raveramiz, axir dunyo bir joyda turgani yo‘q, hammasi o‘zgarmoqda, qolaversa, islom mudrayotgani yo‘q. Hamma narsa bo‘lishi mumkin", — qo‘shimcha qiladi u.
Akayev 1990-2005 yillarda Qirg‘iziston respublikasi prezidenti bo‘lgan. "Lola inqilobi" tufayli hokimiyatni qo‘ldan boy bergan. Ayni damda Lomonosov Davlat Universiteti qoshidagi murakkab tizimlar matematik tadqiqoti Institutida ilmiy faoliyat bilan shug‘ullanmoqda.
