TOShKENT, 27 apr — Sputnik. Toshkentda Chernobil AES halokati oqibatlarini bartaraf etishda ishtirok etganlar xotirasiga bag‘ishlangan marosim bo‘lib o‘tdi. Bu haqda "Rossotrudnichestvo"ning O‘zbekistondagi vakolatxonasi xabar berdi.
Marosim Yangihayot tumanidagi Yo‘ldosh mavzesida joylashgan “Chernobil AES halokatini bartaraf etganlar xotirasiga” yodgorligida tashkil etildi. Yodgorlik poyiga gulchambar va guldastalar qo‘yildi. Tadbirda avariya oqibatlarini bartaraf etish ishtirokchilari, davlat va jamoat tashkilotlari vakillari, diplomatlar, MDH davlatlaridan mehmonlar hamda jurnalistlar qatnashdi.
Insoniyat tarixidagi eng yirik texnogen falokatlardan biri bo‘lgan Chernobil AESdagi avariya 1986-yil 26-aprelda sodir bo‘ldi. To‘rtinchi energoblokdagi portlash reaktorni vayron qilib, atmosferaga radioaktiv moddalar tarqalishiga sabab bo‘ldi.
Avariya oqibatlarini bartaraf etishga yuz minglab odamlar — harbiylar, o‘t o‘chiruvchilar, muhandislar va shifokorlar jalb qilindi. Keyinchalik “likvidatorlar” deb atalgan bu insonlar yuqori radiatsiya sharoitida hayoti va sog‘lig‘ini xavf ostiga qo‘yib ishladi. Ular orasida O‘zbekiston, jumladan, Toshkent aholisi ham bor edi.
Fojia oqibatlari minglab insonlar taqdiriga ta’sir ko‘rsatdi, katta hududlar ifloslandi, stansiya atrofida izolyatsiya zonasi tashkil etildi. Chernobil xotirasi inson xatosining og‘ir oqibatlari va falokatni to‘xtatish uchun o‘zini ayamagan odamlar jasorati haqida eslatma bo‘lib qolmoqda.