TOShKENT, 22 apr — Sputnik. Samarqand viloyat hokimi Adiz Boboyev va Rossiyaning Leningrad viloyati gubernatori Aleksandr Drozdenko boshchiligidagi delegatsiya bilan uchrashuvda hamkorlik memorandumi imzolandi, deb xabar berdi Sputnik O‘zbekiston muxbiri.
Mazkur memorandum madaniy, ta’lim va yoshlar almashinuvini rivojlantirishga qaratilgan.
Tomonlar, jumladan, madaniy meros sohasida hamkorlik qilishga kelishib oldi. Aleksandr Drozdenkoning ta’kidlashicha, Leningrad viloyatida bu yo‘nalish uchun mustahkam baza mavjud bo‘lib, Rojdestvo shahrida Xalqaro restavratsiya markazi faoliyat yuritadi.
“Samarqand murakkab va nozik restavratsiya talab qiladigan buyumlarni yo‘naltirishi mumkin, mutaxassislarimiz esa o‘z kompetensiyalari, texnologiyalari va kasbiy tajribalarini berishga tayyor”, — dedi u.
Uchrashuvda talabalar va yoshlar bilan almashinuv masalalariga ham alohida e’tibor qaratildi. Drozdenkoning so‘zlariga ko‘ra, tomonlar universitetlar o‘rtasida to‘g‘ridan-to‘g‘ri aloqalarni rivojlantirish, gumanitar va aniq fanlar bo‘yicha almashinuv dasturlarini yo‘lga qo‘yish, shuningdek, rus tili va adabiyoti o‘qituvchilarini Leningrad viloyatida o‘qitish va malakasini oshirish imkoniyatlarini kengaytirish niyatida.
“Universitetlar o‘rtasida to‘g‘ridan-to‘g‘ri aloqalarni rivojlantiramiz, gumanitar va aniq yo‘nalishlarda almashinuvlarni yo‘lga qo‘yamiz, Leningrad viloyatida rus tili va adabiyoti o‘qituvchilarini o‘qitish va malakasini oshirish uchun qabul qilamiz”, — dedi gubernator.
Tomonlar yaqin vaqt ichida loyihalarni amalga oshirish bo‘yicha aniq kelishuvlar va yo‘l xaritasini tayyorlash uchun ishchi guruh tashkil etilishiga ishonch bildirdi.