TOShKENT, 15 apr — Sputnik. O‘zbekiston xalq artisti Farrux Zokirov ijodini keng targ‘ib qilish hamda yosh avlodga munosib yetkazish bo‘yicha chora-tadbirlar belgilandi. Bu bo‘yicha tegishli prezident qarori qabul qilindi.
Qarorga ko‘ra, Toshkent shahridagi 7-sonli bolalar musiqa va san’at maktabiga Farrux Zokirov nomi beriladi.
Maktabda “Yalla” bolalar ansambli, Yoshlar ijodiy laboratoriyasi hamda “ustoz-shogird” an’analari asosida estrada yo‘nalishida mahorat maktablari tashkil etiladi. Ustoz-ijodkorlar har oyda mehnatga haq to‘lashning eng kam miqdorining 5 baravari miqdorida rag‘batlantiriladi.
2026/2027 o‘quv yilidan Qoraqalpog‘iston, viloyatlar va Toshkent shahridan 3 nafardan iqtidorli o‘quvchi tanlab olinib, ta’til paytida yozgi to‘garak va estrada xonandaligi bo‘yicha bepul kurslarga jalb etiladi. Shuningdek, zamonaviy ovoz yozish va tasvirga olish studiyasi tashkil etiladi.
2026–2027 yillarda xalqaro nufuzli tanlovlarda g‘olib va sovrindor bo‘lgan o‘quvchilar hamda ularni tayyorlagan o‘qituvchilar bir martalik pul mukofoti bilan rag‘batlantiriladi. “Gran-pri” va 1-o‘rin uchun o‘quvchiga 30 mln, o‘qituvchiga 20 mln so‘m; 2-o‘rin uchun 20 mln va 10 mln so‘m; 3-o‘rin uchun 10 mln va 5 mln so‘m beriladi.
Shuningdek, iqtidorli o‘quvchilarning bayram va yirik anjumanlarda ishtirok etishi qo‘llab-quvvatlanadi. A’lo baholarga o‘qiyotgan 10 nafar o‘quvchi esa ixtisoslashtirilgan san’at va madaniyat maktablariga qo‘shimcha kvota asosida imtihonsiz qabul qilinadi.