TOShKENT, 9 apr – Sputnik. O‘zbekiston Milliy investitsiya jamg‘armasi aksiyalarini bir vaqtning o‘zida ikki maydon — Toshkent va London fond birjalarida joylashtirishga tayyorlanmoqda. Bu haqda Prezident administratsiyasi rahbari Saida Mirziyoyeva ma’lum qildi.
IPO jarayonini jamg‘armaning ishonchli boshqaruvchisi bo‘lgan “Franklin Templeton” xalqaro investitsiya kompaniyasi muvofiqlashtirmoqda. Jamg‘arma saytida qayd etilishicha, UzNIFga 13 ta davlat korxonasidagi minoritar ulushlar berilgan bo‘lib, ularning qiymati taxminan 2,44 milliard dollarga baholanmoqda.
Mirziyoyevaga ko‘ra, bu qadam xorijiy investorlar uchun aniq va kuchli ishoradir. U O‘zbekiston global qoidalar asosida ochiq va shaffof ishlashga tayyor ekanini ko‘rsatadi.
Eslatib o‘tamiz, prezidentning tegishli qaroriga ko‘ra, 2026-yil yakuniga qadar Milliy investitsiya jamg‘armasi ustav kapitalidagi 30 foizgacha aksiyalar paketining xalqaro va mahalliy fond bozorlarida birlamchi ommaviy taklifi o‘tkazilishi rejalashtirilgan.