TOShKENT, 2 apr — Sputnik. Prezident huzurida O‘zbekiston prezidenti Xalq qabulxonasi tashkil etiladi.
Qoraqalpog‘iston Vazirlar Kengashi raisi, viloyatlar, Toshkent shahri hamda tuman va shahar hokimlari tegishli Xalq qabulxonalariga jamoatchilik asosida rahbarlik qiladi. Ular bu yerda fuqarolarni muntazam shaxsan qabul qilib, muammolarni joyida hal etish, murojaatlarni tahlil qilish bilan shug‘ullanadi.
Shuningdek, vazirlik va idoralar rahbarlari, Qoraqalpog‘iston Vazirlar Kengashi raisi, viloyatlar va Toshkent shahri hokimlari prezident huzurida o‘tkaziladigan taqdimotlarda aholi murojaatlarida ko‘tarilgan tizimli muammolar va ularni hal etish rejalari bo‘yicha alohida hisobot beradi.
Yana bir yangilik — davlat organlari, tashkilotlar va mahalliy hokimliklar o‘tkazadigan shaxsiy hamda sayyor qabullar to‘liq raqamlashtiriladi. Bu orqali qabullar jarayoni ustidan nazorat kuchaytiriladi.
Jamoaviy murojaatlar aholi vakillari va “mahalla yettiligi” ishtirokida o‘rganiladi. Bunday murojaatlar faqat murojaatchilarning roziligi bilan nazoratdan olinadi.