TOShKENT, 5 mar — Sputnik. O‘zbekistonda aholini uy-joy bilan ta’minlash ishlarini jadallashtirish va ko‘p kvartirali uylar qurilishini tashkil etish bo‘yicha chora-tadbirlar belgilandi. Bu haqda prezident farmoni qabul qilindi.
Hujjat aholini uy-joy bilan ta’minlash tizimini takomillashtirish va ko‘p kvartirali uylar qurilishini rag‘batlantirishga qaratilgan.
Farmonning asosiy maqsadlari:
uy-joy qurilishini rag‘batlantirish va fuqarolarning uy-joyga bo‘lgan huquqini ta’minlash;
ko‘p kvartirali uylar bozorida talabga mos taklifni oshirish;
yer ajratish va ruxsat berish jarayonlarini soddalashtirib, investitsiya-qurilish davrini 1,5 baravargacha qisqartirish.
Farmonga ko‘ra, hududlarda “Yangi O‘zbekiston” massivlari uchun tanlab olingan yangi hududlarga ushbu maqom berilib, ularga amaldagi tartiblar va moliyalashtirish mexanizmlari tatbiq etiladi.
Mazkur massivlarda yo‘l-transport infratuzilmasi qurilishida:
qayta tiklanuvchi energiya manbalari;
energiya tejovchi uskunalar;
muqobil issiqlik tizimlari qo‘llaniladi.
Shuningdek, “yashil” transport muhitini shakllantirish rejalashtirilgan.
Farmonga muvofiq, tadbirkorlar va davlat organlari o‘rtasida ko‘prik vazifasini bajaradigan investitsiya kompaniyalari tashkil etiladi.
Ipoteka dasturi doirasida bir qator yangiliklar joriy etiladi.
Jumladan:
uy sotib olish uchun subsidiya ajratiladigan fuqarolarni baholash jarayoni subsidiya.idm.uz platformasi orqali inson omilisiz avtomatlashtiriladi;
1 apreldan budjet resurslari hisobidan ipoteka kreditlari rasmiy daromadga ega fuqarolarga, shuningdek, ijtimoiy soliqni ixtiyoriy to‘lagan o‘zini o‘zi band qilgan shaxslarga ham ajratiladi.
Bunda:
2026 yilda — oxirgi 1-yil davomida,
2027 yilda — 2-yil,
2028 yildan — 3-yil davomida ijtimoiy soliqni to‘liq to‘laganlar ipoteka olish imkoniyatiga ega bo‘ladi.