TOShKENT, 19 fev — Sputnik. O‘zbekiston va Serbiya Savdo-sanoat palatalari o‘rtasida Ishbilarmonlar kengashini tashkil etish to‘g‘risida bitim imzolandi.
Bitim O‘zbekiston Savdo-sanoat palatasida Serbiya bosh vaziri o‘rinbosari — iqtisodiyot vaziri Andreana Mesarovich bilan uchrashuv doirasida imzolandi.
Yangi tuzilma ikki mamlakat biznesi o‘rtasida doimiy muloqot va amaliy hamkorlik platformasi bo‘ladi.
Uchrashuvda elektrotexnika, mashinasozlik, oziq-ovqat sanoati va to‘qimachilik sohalarida qo‘shma loyihalarni faollashtirish masalalari muhokama qilindi.
Tomonlar Belgradda O‘zbekiston Savdo uyini va O‘zbekistonda Serbiya Savdo uyini ochish tashabbusini ilgari surdi. Bu mahsulotlarni ikki mamlakat bozoriga tizimli olib kirish va tovar ayirboshlash hajmini oshirishga xizmat qilishi kutilmoqda.
Shuningdek, Serbiyada “Made in Uzbekistan” milliy ekspozitsiyasini tashkil etish hamda tadbirkorlar o‘rtasida muntazam B2B uchrashuvlarini yo‘lga qo‘yish bo‘yicha kelishuvga erishildi.