TOShKENT, 3 fev — Sputnik. Hayitbek O‘rmonov “Rossiya yadroviy ta’lim elchilari” loyihasi doirasida o‘tkazilgan treningda ishtirok etib, yadro ta’limi elchisi (ambascadori) sifatida tanlandi. Bu haqda "Moskva muhandislik-fizika instituti" milliy tadqiqot yadro universiteti ("MMFI" MTAU) Toshkent filiali matbuot xizmati xabar berdi.
O‘rmonov "MMFI" MTAU Toshkent filiali talabasi.
Loyiha har yili "Rosatom" Texnika akademiyasi tomonidan amalga oshiriladi. Trening Moskva shahrida o‘tkazilib, "Rosatom"ning tayanch oliy o‘quv yurtlarida tahsil olayotgan xorijiy talabalarni birlashtirdi.
Uch kun davomida ishtirokchilar moslashuvchan ko‘nikmalar va yetakchilik qobiliyatlarini rivojlantirishdi. Ular o‘z-o‘zini samarali taqdim etish, maqsadlari haqida ishonch bilan so‘zlash, hikoya qilish orqali ta’sirchan nutq qurish usullarini o‘zlashtirdilar. Shuningdek, tezkor dalillash va mantiqiy, tizimli nutq tuzishga alohida e’tibor qaratildi.
Trening interaktiv tarzda o‘tdi: amaliy topshiriqlar, jamoaviy o‘yinlar, muhokamalar va chiqishlar ishtirokchilarning shaxsiy salohiyatini ochib berishga qaratildi. Loyiha tantanali taqdirlash marosimi bilan yakunlandi.