TOShKENT, 1 fev — Sputnik. AQSh prezidenti Donald Tramp Truth Social sahifasida sobiq prezident Barak Obamani hibsga olishga chaqirdi. Bu haqda The American Conservative nashri xabar berdi.
Nashr yozishicha, Tramp postida Obamani 2016-yilgi saylovlar davrida “davlat to‘ntarishiga urinish”da ayblagan va Milliy razvedka direktori Tulsi Gabbard tomonidan “Russiagate” ishiga oid hujjatlar e’lon qilinganini tilga olgan.
Trampning bayonotiga ko‘ra, Gabbard e’lon qilgan ushbu hujjatlar Obama Markaziy razvedka boshqarmasi agentlariga Tramp haqida soxta razvedka ma’lumotlari tayyorlashni shaxsan topshirganini ko‘rsatadi. Uning ta’kidlashicha, bu harakat amerikaliklarning demokratiyaga va uning 2016-yilgi g‘alabasiga bo‘lgan ishonchini susaytirishga qaratilgan bo‘lgan.
Tramp postida shunday deyiladi:
Bu Barak Husayn Obama va uning hamtovoqlarining davlat to‘ntarishiga urinishi edi… Jessi Uotters aytganidek, “Bu yigitlarga nima bo‘lsa ham, bu qasos emas… bu javobgarlik. Odamlar buning badalini to‘laydigan vaqt keldi.” OBAMANI HOZIROQ QAMOQQA OLING!
Nashr ta’kidlashicha, bu chaqiriq FBR tomonidan Jorjiya shtatidagi Fulton okrugi saylov idorasidan 2020-yilgi saylovlarga oid hujjatlar olib qo‘yilgani haqidagi xabarlardan so‘ng yangragan. Ushbu jarayonda Gabbard va FBR rahbariyati vakillari ishtirok etgani aytilmoqda.
Hozircha Obama tomonidan mazkur bayonotlarga rasmiy munosabat bildirilmagan.
Ma’lumot uchun, “Russiagate” — 2016-yilgi AQSh saylovlariga Rossiya aralashgani haqidagi da’volar bilan bog‘liq siyosiy mojaro nomi. Ayrim siyosatchilar va tahlilchilar buni tasdiqlanmagan ayblovlar va soxta ma’lumotlarga tayangan kampaniya, deb baholaydi.