TOShKENT, 25 sen — Sputnik. 25 sentabr kuni O‘zbekiston tashqi ishlar vaziri Baxtiyor Saidov Osiyoda hamkorlik va ishonch choralari bo‘yicha kengash (OHIChK) tashqi ishlar vazirlari norasmiy yig‘ilishida ishtirok etdi. Bu haqda Tashqi ishlar vazirligi matbuot xizmati xabar berdi.
"Muloqot jarayoni mintaqaviy va global masalalar, shuningdek, Osiyo bo‘ylab ishonchni mustahkamlash choralarini yanada kuchaytirish yuzasidan hamkasblar bilan fikr almashish uchun muhim imkoniyat bo‘ldi", - deb yozdi Saidov o‘zining Telegram-kanalida.
O‘zbekiston OHIChK maqsad va tamoyillariga sodiq qoladi hamda umumiy makonda muloqot, ishonch va hamkorlikni mustahkamlashga qaratilgan sa’y-harakatlarni izchil qo‘llab-quvvatlashda davom etadi.
Ma’lumot uchun: Kengash Osiyoda tinchlik, xavfsizlik va barqarorlikni ta’minlashga qaratilgan hamkorlikni mustahkamlash bo‘yicha xalqaro forum hisoblanadi.