TOShKENT, 25 sen – Sputnik. O‘zbekiston va Xitoy oftalmologlari birgalikda yuzdan ortiq xayriya jarrohliklarini o‘tkazishadi. Bu haqda O‘zbekiston Sog‘liqni saqlash vazirligi (SSV) xabar berdi.
Ma’lumotlarga ko‘ra, Respublika ixtisoslashtirilgan ko‘z mikroxirurgiyasi ilmiy-amaliy tibbiyot markazi mutaxassislari xitoylik jarrohlar bilan birgalikda ijtimoiy himoyaga muhtoj va ko‘z kataraktasidan aziyat chekayotgan bemorlarda yuqori texnologiyali operatsiyalarni amalga oshirishga bag‘ishlangan muruvvat aksiyasini o‘tkazishni boshlashgan.
“Bu yil ezgu tashabbus doirasida mamlakatimizning 3 ta hududida ijtimoiy himoyaga muhtoj 600 nafardan ortiq bemorlarning ko‘rish qobiliyati tiklanadi. Ayni paytda aksiya Qo‘qon va Qarshi shahrida o‘tkazilmoqda”, – deyiladi xabarda.
Bundan avvalroq, Rossiyaning yetakchi shifokorlari ham O‘zbekistonga tashrif buyurib, “Ezgulik missiyasi”ni amalga oshirishgan edi. Missiya doirasida ham jarrohlik amaliyotlari o‘tkazilib, ilmiy-amaliy ma’ruzalar ham tashkil etilgan edi.