TOShKENT, 8 mar — Sputnik. Prezident Shavkat Mirziyoyev Xalqaro xotin-qizlar kuniga bag‘ishlangan tantanali tadbirda ishtirok etdi va davlat mukofotlarini topshirdi. Bu haqda prezident matbuot xizmati xabar berdi.
Ko‘ksaroy qarorgohida Xalqaro xotin-qizlar kuni munosabati bilan bayram tadbiri bo‘lib o‘tdi.
Prezidentning shu yil 3-martdagi qaroriga binoan 28 nafar qiz Zulfiya nomidagi Davlat mukofoti bilan, 4-martdagi farmonga muvofiq, mehnat faoliyati va jamoat ishlarida katta natijalarga erishgan bir guruh ayollar orden va medallar bilan taqdirlangan edi. Tadbirda ana shu yuksak mukofotlar tantanali ravishda topshirildi.
Marosim so‘ngida Shavkat Mirziyoyev O‘zbekiston xalqi nomidan ayollarni yana bir bor tabriklab, ezgu tilaklar bildirdi.
“Barchangizga sihat-salomatlik, xonadonlaringizga tinchlik-omonlik, dunyodagi eng katta boylik – oilaviy baxt-saodat yor bo‘lishini tilayman. Doimo farzandlaringiz va yaqinlaringiz, el-yurtimiz ardog‘ida yurish nasib etsin”, – dedi prezident.
Bayram doirasida “O‘zbekiston” anjumanlar saroyida tantanali konsert namoyish etildi.