TOShKENT, 27 sen — Sputnik. Ayni damda O‘zbekiston hududida qurilayotgan 30 mingga yaqin obyektlarga 500 nafar nazoratchi nomma-nom biriktiriladi, dedi AOKAda o‘tkazilgan brifingda Qurilish va uy-joy kommunal xo‘jaligi vazirligi axborot xizmati rahbari Saidnosir Usmonov.
Nazoratchilar bodi-kameralar bilan ta’minlangan. Qurilish obyektlarida aniqlangan xato va kamchiliklarni joyida bartaraf etish maqsadida hududiy inspeksiyalarda quruvchi-operatorlar shtabi tashkil qilinadi.
Davlat hisobidan qurilayotgan barcha obyektga toifasiga qarab kamida 2 tadan videokamera o‘rnatiladi. Kuzatuv qurilmasi operatorlar shtabiga ma’lumotlarni onlayn yetkazib turadi. Shu orqali qurilish jarayonlari, buyurtmachining texnik, loyihachining mualliflik, pudratchining ichki nazorat ishlari doimiy davlat nazoratida bo‘ladi.
Har bir qurilayotgan obyekt oldida QR kodli pasport o‘rnatiladi. Agar bunday turdagi pasport bo‘lmasa, qurilish noqonuniy hisoblanadi. Qurilish pasportida qurilishga taalluqli barcha shaharsozlik hujjatlari bo‘lishi shart.
Noqonuniy qurilishlar bo‘yicha mahalla raislari va jamoatchilik nazorati kuchaytirilmoqda. Bu orqali shaharsozlik hujjatlarini rasmiylashtirmasdan, hududiy inspeksiyalar ro‘yxatidan o‘tmasdan o‘zboshimchalik bilan boshlab yuborilgan qurilishlarni o‘z vaqtida to‘xtatish choralari ko‘riladi.
Eslatib o‘tamiz, 23-sentabrda bo‘lib o‘tgan yig‘ilishda prezident Shavkat Mirziyoyev O‘zbekiston hududida olib borilayotgan qurilish obyektlarida nazoratni kuchaytirish vazifani qo‘ygan edi.