TOShKENT, 23 sen — Sputnik. Vengriyada bo‘lib o‘tgan 45-Butunjahon shaxmat olimpiadasida O‘zbekiston erkaklar terma jamoasi 189 ta jamoa orasida bronza (3-o‘rin) medaliga sazovor bo‘ldi, deya xabar berdi Milliy olimpiya qo‘mitasi.
Vengriyaning Budapesht shahrida 45-Butunjahon shaxmat olimpiadasi o‘z yakuniga yetdi.
Murosasiz bahslarda g‘oliblik Hindiston jamoasiga nasib etgan bo‘lsa, AQSh grossmeysterlari kumush medallar bilan taqdirlanishdi.
Individual yo‘nalishlarda ham shaxmatchilar sovrinlarga ega chiqishdi:
Shamsiddin Vohidov (4-taxta);
Nodirbek Abdusattorov (1-taxta);
Nodira Nodirjonova (5-taxta).
“Hamurtlarimiz 2-yil muqaddan Hindistonda o‘tgan Olimpiadada chempionlikka erishgan edi. Shu tariqa, jamoamiz qatorasiga ikkinchi bor sovrindor bo‘lmoqda. Endi yana 2-yildan so‘ng dunyoning eng kuchli grossmeysterlari O‘zbekiston mezbonlik qiladigan navbatdagi Olimpiadada jam bo‘lishadi”, — deyiladi xabarda.
Qizlar jamoasi esa 170 ta jamoa orasida 12-o‘rinni egalladi. Taxtalar kesimida: 5-taxtada Nodira Nodirjanova 2-o‘rin va kumush medalni qo‘lga kiritdi.
Musobaqa g‘olib va sovrindorlarini taqdirlash marosimi yakunida an’anaga ko‘ra navbatdagi shaxmat Olimpiadasi mezboniga estafeta tantanali ravishda topshirildi.
Hisob bo‘yicha 46-Butunjahon shaxmat Olimpiadasi 2026-yil Toshkent shahrida o‘tkaziladi. FIDE prezidenti Arkadiy Dvorkovich ushbu musobaqa bayrog‘i hamda mash’alasini terma jamoa yetakchisi Nodirbek Abdusattorovga topshirdi.