TOShKENT, 27-may — Sputnik. Rossiya va O‘zbekiston prezidentlari Vladimir Putin va Shavkat Mirziyoyevning shaxsiy munosabatlari juda yaxshi. Bu haqda Rossiya yetakchisi matbuot kotibi Dmitriy Peskov Birinchi kanal efirida ma’lum qildi.
“Tabiiyki, O‘zbekiston prezidenti bizning prezidentimiz borasida ijobiy fikrda, ularning shaxsiy munosabatlari juda yaxshi”, — dedi Peskov.
U, shuningdek, yetakchilarning norasmiy muloqoti ham muhim ekanini aytib o‘tdi.
“Aynan mana shunday norasmiy muloqot xavfsizlik, ikki tomonlama munosabatlar, mintaqaviy hamkorlik va boshqa jihatlarga taalluqli nozik masalalarni muhokama qilish uchun maydonga aylanadi”, — deya qayd etdi u.
Eslatib o‘tamiz, Rossiya prezidenti Vladimir Putin 26-27 may kunlari davlat tashrifi bilan O‘zbekistonda bo‘lib turibdi. Tashrif doirasida O‘zbekiston va Rossiya hududlari kengashining birinchi yig‘ilishi bo‘lib o‘tadi va unda prezidentlar ishtirok etadi.