TOShKENT, 12-may — Sputnik. Yaqin yillardagi Yevroosiyo iqtisodiy ittifoqi (YeOII) faoliyatining eng muhim yo‘nalishi “erkin savdo zonasini kengaytirish” bo‘ladi. Bu haqda Siyosiy ekspertlar guruhi rahbari Konstantin Kalachov ma’lum qildi, deb yozmoqda Sputnik Tojikiston.
Moskvada Yevroosiyo iqtisodiy ittifoqining 10-yilligiga bag‘ishlangan yubiley sammiti bo‘lib o‘tdi, unda beshta davlat rahbarlari ishtirok etdi. Siyosiy ekspertlar guruhi rahbari Konstantin Kalachov "Sputnik na russkom"ga bergan intervyusida YeOII 10-yil davomida qanday natijalarga erishganini aytdi.
“YeOII YevroAzES (Yevrosiyo iqtisodiy hamjamiyati, 2001-yildan 2010-yilgacha mavjud bo‘lgan tuzilma, YeOII tashkil etilishi munosabati bilan tugatilgan) va Bojxona ittifoqidan boshlandi. Maqsadlar aniq va oddiy edi – tovarlar, xizmatlar, kapital va ishchi kuchi harakati erkinligi”, — dedi ekspert.
Yagona iqtisodiy makonni barpo etish nuqtayi nazaridan erishilgan yutuqlar yaqqol ko‘rinib turibdi, deb hisoblaydi u.
"Biz real iqtisodiy integratsiyani ko‘rmoqdamiz, savdo aylanmasining juda jiddiy o‘sishi, yagona bojxona maydoni", — deya tushuntirdi Kalachov.
Uning so‘zlariga ko‘ra, YeOIIdan barcha mamlakatlar uchun rivojlanish drayveri sifatida foydalanish, ittifoq imkoniyatlaridan foydalangan holda tashqi chaqiriqlar, tahdid va xatarlarga javob berish imkoniyati muhim ahamiyatga ega.
"Yaqin yillardagi YeOII faoliyatining eng muhim yo‘nalishi erkin savdo zonasini kengaytirish bo‘ladi. Bu borada Mo‘g‘uliston, Tailand, Misr, Hindiston va Xitoy kabi davlatlar bilan muzokaralar davom etmoqda", — deya eslatdi tahlilchi.
U asosiysi, nol bojlar, Rossiya tovarlarini ham ushbu mamlakatlarga, ham u yerdan Rossiya Federatsiyasiga bojsiz olib kirish, shuningdek, jahon savdosini yanada rivojlantirish ekanligini tushuntirdi.