TOShKENT, 10 fev — Sputnik. Yevroosiyo iqtisodiy ittifoqida hamkorlik loyihalarini moliyaviy qo‘llab-quvvatlash mexanizmining joriy etilishi iqtisodiyotning real sektoriga Yevroosiyo integratsiyasining yangi bosqichiga chiqish imkonini beradi. Bu haqda Yevroosiyo iqtisodiy komissiyasining sanoat va agrosanoat kompleksi vaziri Goar Barsegan “Rossiya-2030 va yangi jahon iqtisodiy tartibi: asosiy omillar va biznesning roli” xalqaro forumida aytib o‘tdi.
“Yangi mexanizmni amalga oshirish YeOII doirasida 2030-yilgacha va 2045-yilgacha bo‘lgan davrda iqtisodiy jarayonlarni yanada rivojlantirish to‘g‘risidagi deklaratsiyada aks etgan sanoatni rivojlantirishning asosiy vazifalarini hal qilishga yordam beradi”, — dedi Goar Barsegan.
Vazir kooperatsiya loyihalarini moliyaviy qo‘llab-quvvatlashning yangi shakli Ittifoq davlatlarining sarmoyaviy jozibadorligini oshirishini alohida ta’kidlab, ishbilarmon doiralar uyushmalari va biznes vakillarini yangi millatlararo vositani amalda tatbiq etishda faol ishtirok etishga chaqirdi.
“YeOII mamlakatlarini asosiy oziq-ovqat turlari bilan ta’minlash darajasi 93 foizga yetdi. Bu a’zo davlatlarga yuzaga kelayotgan muammolarga jamoaviy asosda samarali qarshi turish imkonini beradi”, — dedi vazir.
Yakunda Goar Barsegan integratsiya a’zo davlatlarga beradigan imtiyozlardan samarali foydalanish muhimligini ta’kidladi. Vazirning so‘zlariga ko‘ra, “beshlik” mamlakatlari iqtisodiyotining bir-birini to‘ldirishi ularga nafaqat oddiy fuqarolarning turmush darajasini yaxshilash, balki butun Yevroosiyo makonida ishbilarmonlik muhitini yaxshilash bo‘yicha eng ulug‘vor maqsadlarni qo‘yish imkonini beradi.