TOShKENT, 30 okt — Sputnik. "UzAuto Motors" kompaniyasi 30-oktabrdan boshlab avtomobillar xarid qilish bo‘yicha shartnomalar qayta tiklanishi haqidagi mish-mishlarni rad etdi.
Avvalroq ijtimoiy tarmoqlarda "Chevrolet Gentra", "Cobalt" va "Damas" avtomobillari uchun shartnomalar ochilishi haqidagi mish-mishlar tarqaldi. Shu bois avtosalonlarda katta navbatlar hosil bo‘ldi.
“Bugun bir qancha avtoixlosmandlar avtomobillar uchun kontraktatsiya boshlangani to‘g‘risidagi mish-mishlarga ishonib, ertalabdan dilerlik markazlariga kelishgani sababli katta navbatlar yuzaga keldi", - deyilgan "UzAuto Motors" xabarida.
Kompaniya sotuv boshlanganligi to‘g‘risida va boshqa murojaatlar bo‘yicha ma’lumotlarni "UzAuto Motors"ning rasmiy kanallaridan olish mumkinligini eslatgan.
