TOShKENT, 29 sen — Sputnik. Toshkent shahri Sergeli tumanida yuz bergan portlashda shikastlangan BYD avtomobillari utilizatsiya qilishga yuboriladi, deya xabar berdi Xitoy kompaniyasi.
Kecha Sergeli tumanidagi bojxona ombori hududida portlash sodir bo‘lib, uning sabablari va holatlari hozirda maxsus xizmatlar tomonidan o‘rganilmoqda.
Voqea sodir bo‘lgan vaqtda bojxona omboriga tutash hududda BYD rusumli avtomobillar ham bo‘lgan. Afsuski, ularning ba’zilari portlash to‘lqini va shisha parchalaridan yuzaki zarar ko‘rgan.
“Barcha shikastlangan avtomobillar utilizatsiya qilishga yuboriladi, zero bu xavfsizlik va atrof-muhitni saqlash nuqtayi nazaridan muhimdir. Avtomobillarni yetkazib berish bo‘yicha barcha majburiyatlar shartnomada ko‘rsatilgan muddatlarda bajariladi”, — deyiladi xabarda.
Xabarda portlash sabablari bo‘yicha surishtiruv ishlari olib borilayotganligi va yakuniy ekspert xulosasi yo‘qligi sababli, hodisaga elektr transport vositalarining aloqadorligi yoki boshqa faktlar haqidagi ma’lumotlarni tarqatmaslik so‘ralgan.
Kompaniya shuningdek, fojiali hodisa tufayli barcha jabrlanganlar va ularning oila a’zolariga hamdardlik bildirgan.