TOShKENT, 28 sen — Sputnik. Toshkent shahri Sergeli tumanidagi “Inter Logistics“ MChJ omborxonasida yuz bergan portlash yuzasidan jinoiy ish qo‘zg‘atildi. Bu haqda Ichki ishlar vazirligi axborot xizmati ma’lum qildi.
“Mazkur holat yuzasidan IIV Tergov departamenti tomonidan O‘zbekiston Respublikasi JKning 259-moddasi (Yong‘in xavfsizligi qoidalarini buzish) 2-qismi “a” va ”b” bandlari bilan jinoyat ishi qo‘zg‘atilgan”, - deyilgan xabarda.
Hozir jinoyat ishi yuzasidan tegishli idoralarning mutaxassislaridan iborat tergov-tezkor guruhi tuzilgan. Yong‘in kelib chiqish sabablarini aniqlash maqsadida sudga oid tegishli ekspertizalar tayinlangan. Kechiktirib bo‘lmaydigan tergov harakatlari amalga oshirilmoqda.
Vazirlik voqea tafsilotlari yuzasidan axborot berib borilishini qo‘shimcha qilgan.
Eslatib o‘tamiz, 28-sentabr kuni soat 02:43 da Toshkent shahrining Sergeli tumanida “Inter Logistics” kompaniyasi omborida kuchli portlash sodir bo‘ldi.
SSV xabariga ko‘ra, hodisa oqibatida jabrlanganlarning umumiy soni 163 nafarni tashkil etmoqda. 2006-yilda tug‘ilgan bir nafar o‘smir bola esa voqea joyida vafot etgan.
Hodisa tafsilotlarini o‘rganish yuzasidan bosh vazir o‘rinbosari Ochilboy Ramatov boshchiligida Hukumat komissiyasi tuzilgan.