Toshkentdagi kuchli portlash: ayni damda nimalar sodir bo‘lmoqda — foto, video

Sergelidagi portlash oqibatida tovar to‘liq yaroqsiz holatga kelgan bo‘lsa, ushbu tovarga nisbatan iqtisodiy siyosat choralari qo‘llanilmaydi.

Bu haqda Bojxona qo‘mitasi matbuot xizmati bosh inspektori Husan Tangriyev ma’lum qildi.

Sergeli tumanidagi favqulodda holat sodir bo‘lgan omborda bojxona organlari tomonidan qator chora-tadbirlar davom ettirilmoqda. Xususan, Bojxona qo‘mitasi tomonidan maxsus ishchi guruh tashkil qilingan bo‘lib, yong‘indan zarar ko‘rgan bojxona nazorati ostidagi tovarlar to‘liq inventarizatsiyadan o‘tkazilmoqda.

Sergeli tumanidagi 26 ta ko‘p qavatli uydagi 592 ta xonadon hamda 8 ta xizmat ko‘rsatish shahobchasi, 1 ta maktab va 2 ta MTT binolarining fasad qismi hamda deraza-romlariga zarar yetgan — Toshkent shahar hokimligi.

Elbek Shukurovning aytishicha, yong‘indan jabr ko‘rgan aholi doimiy nazoratga olingan.

IIVga ko‘ra, Jinoyat kodeksining 259-moddasi (Yong‘in xavfsizligi qoidalarini buzish) 2-qismi “a” va ”b” bandlari bilan jinoyat ishi qo‘zg‘atilgan.

Portlash oqibatida jabrlanganlarning umumiy soni 163 nafarni tashkil etmoqda.

Shundan jami 24 nafari Respublika shoshilinch tibbiy yordam ilmiy markazi va uning Toshkent viloyati filiali, Toshkent shahar tez tibbiy yordam shifoxonasi, 1-sonli Respublika va 1-sonli shahar klinik shifoxonalari hamda 1-sonli shahar tug‘uruqxonasiga yotqizildi.

Qolgan 134 nafar jabrlangan aholi vakilining salomatligi yaxshi bo‘lganligi uchun ambulator tibbiy yordam ko‘rsatilib, uyiga javob berilgan.

Hodisa oqibatida 2006-yilda tug‘ilgan bir nafar o‘smir voqea joyida vafot etgan va shifoxonaga tiriklik alomatlari bo‘lmagan holda olib kelingan.