TOShKENT, 23 mar — Sputnik. Iftorlik vaqtida suv, salat, ovqat va shirinlikni iste’mol qilishda tegishli qoidalarga amal qilish kerak. Bu bo‘yicha Sanitariya-epidemiologiya qo‘mitasi iftorlik vaqti uchun 5 ta tibbiy tavsiyani sanab o‘tdi.
Birinchi navbatda, iftorlik vaqti bir stakan suv ichib, iftorlik ovqatini yemay, bir necha daqiqa kutib turish kerak.
Asosiy ovqatni yemasdan oldin salatlardan tanovul qilish. O‘zingizni biroz to‘ygandek his qilsangiz, o‘n daqiqa kuting-da, so‘ngra ovqat yeyishni davom ettiring.
Iftorlik taomini shoshmasdan, ohista yeyish. Shunda hazm jarayoni mukammal bo‘lib, qorin shishishining oldi olinadi.
Iftorlikni yeb bo‘lgan zahoti shirinlik yemaslik. Chunki bu ham hazmni qiyinlashtiradi. Shirinlikni asosiy taomdan bir necha soat keyin yegan yaxshi.
Iftorlik bilan saharlik orasida 1,5 yoki 2 litr suv ichish tavsiya qilinadi. Shunda tanangiz kun davomida yo‘qotgan suyuqlikning o‘rnini to‘ldirib oladi.