TOShKENT, 2 okt — Sputnik. Hindistonda odamlarni olib ketayotgan traktor va tirkamaning hovuzga qulashi oqibatida kamida 27 kishi halok bo‘ldi, 20 dan ortiq kishi jarohatlandi. Bu haqda “Times of India” xabar bermoqda.
Hodisa kechasi Uttar-Pradesh shtatining Kanpur okrugida sodir bo‘lgan. Tirkamada 50 ga yaqin odamni olib ketayotgan traktor haydovchisi boshqaruvni yo‘qotib qo‘ygan, shundan so‘ng mashina suvga qulagan. Mahalliy hukumatga ko‘ra, qurbonlarning aksariyati ayollar va bolalardir. Ularning barchasi mahalliy ibodatxonadagi diniy marosimdan uyiga qaytayotgan bo‘lgan.
“Kanpurdagi traktor tirkamasi halokatidan qayg‘udaman. Mening hayolim yaqinlarini yo‘qotganlarda. Yaradorlarga duodamiz. Mahalliy ma’muriyat jabrlanganlarga har tomonlama yordam ko‘rsatmoqda”, deb yozdi Hindiston bosh vaziri Narendra Modi ijtimoiy tarmoqdagi sahifasida.
Uning qo‘shimcha qilishicha, qurbonlarning oilalariga bosh vazirning yordam fondidan 200 ming rupiy (2440 dollar), jabrlanganlarga esa 50 ming rupiy (612 dollar) miqdorida tovon puli to‘lanadi.
Uttar-Pradesh bosh vaziri Yogi Adityanathning aytishicha, “tirkamali traktorlar odamlarni emas, balki faqat yuk tashish uchun ishlatilishi kerak”.